نفوسهم عفيييييفة!! وحاجاتهم خفييييفة
كتب عبد الله عثمان:
الكسرة اسم الله الأعظم
الكسرة بالموية فيها شفاء الظاهر والباطن
حكى لينا الأستاذ سعيد بتصرّف:
زمان كان المسائل بسيطة.. غاية في البساطة.. كنا نلعب الكورة.. تنضرب تنجرح فى كراعك.. تقوم طوالي تمسحها بالتراب وتواصل لعبك.. بعدين زي العشاء كده.. تقوم تنقرفها.. حاجة لذيييذة كده.. فيها طرف من "العذاب من العذوبة"... شويتين وتلقاها نشفت وبرت... خلاس! الليلة لو انضربت إلا تعمل تعقيم وممكن الجرح يعمل ليك مشاكل.. الليلة فى أمراض ينقلوا ليها الناس الأردن وكمان يفتشوا على دكتور معين ومستشفى معين ويمكن يعالجك ويمكن لا.. ابن آدم بقى عندو حيل كثيرة.. عشان كده ربنا جعل مسائله صعبة.. لو ما وقفت الحيل دي.. الله ما بيسر ليه أمره..
======
ما انبعج
شيخ مشهده الجوع ومسلِّك حيرانه على كدا
جاهو ضيف.... قال للحيران: ادوهو حرف كسرة!
جوهوا قال ليهو: اكلها!!
قال ليهم: اكلها كلها؟!
قالوا ليهو: نعم!
قال ليهم:
ما انبعج!
===========
من لطايف الجزارين في أم درمان، مشكرين كثرة دهن لحمتهم: لحمة توديك الأردن!!
============
دخل مسافر على بيت رجل زاهد فتعجب لم ير متاعا فسأل صاحب المنزل:
اين متاعك؟!
قال له الرجل:
وأنتا!! أين متاعك
رد: أنا مسافر!!
قال له الزاهد: أنا أيضا مسافر.
===============
==============
زايلي ونعيمكي زايل
الطيب ود ضحوية
شيخ الهمباتة المشهور في لحظات الاحتضار طلب المصحف مسكو حضنو وقال :----
يا من أنبت الزرع المخضر فرعو
يا من بدل الدم باللبن في ضرعو
يا رزاق الخلوق حتى المخالفين شرعو
أسقي عرق شجرتي الديمة يابس فرعو
+++
يوما نداور البكرة ونمصرو ثديها
ويوما نشق عتاميرا بعيدة وتيها
يانفس السواد المتعة كملتيها
أبقي لزومة وكت القرعة وقعت فيها
..
وأيضا وهو ينظر للسحاب :----
كيف أمسيتي يا المزنة أم سحابا شايل
وشن سويتي في السلمة وبليد ناس نايل
واحدين في الخلاء واحدين يسوقو الشايل
معاك سلامة يا الدنيا أم نعيما زايل
==============
في موسم الهجرة إلى الشمال، في القطار، سأل القس الصبي (وقتها) مصطفى سعيد: مع من تسافر؟!
أجاب الصبي: أسافر لوحدي!!
قال له القس: كلنا، في آخر الأمر، نسافر لوحدنا يا بنيّ!!
تعليقات
إرسال تعليق