طوى بِرشو ...!!

كتب عبدالله عثمان: 
رسِّل زول لسوق المسلمية يكورك:
يا ناس.. فلان ود فلان خلاص طوى برشو
قصص لا تسمعها إلا في مجالسه
رجل من منطقة المسلمية، كان يتردد على الشيخ عبد الباقي (أزرق طيبة)، ويقيم معه الأيام، ورأى بعينيه الحال والضيافة وإكرام الضيفان والخدمة... وديل طالعين، وديل نازلين...
فأعجبه الحال، وتمنى لو يستطيع أن ينقل هذا الحال إلى منزله في قريته، فيتحزم بالطريقة، ويكرم الضيفان ويخدمهم.
ثم إن الفكرة ألحّت عليه، فذهب إلى الشيخ عبد الباقي، وأخبره برغبته، ولكن الشيخ عبد الباقي صرفه عن ذلك، وطلب إليه أن يكتفي بضيف الشريعة، دون أن يذهب أبعد من ذلك.
فألحَّ الرجل، ولما رأى الشيخ إصراره، سمح له بذلك.
ولكن الرجل سأله:
(كيف أعمل لكي أملأ المسيد بالناس؟!)
قال ليهو الشيخ:
(رسٍّل زول سوق المسلمية، يوم السوق، وخليهو ينبه الناس أن فلانًا قد فتح بيتو للغاشي والماشي).
ثم إن الرجل فعل كما سمع.
فتسامع الناس، وما يمر يوم إلا والمزيد من الناس يسمعون، فضربت إليه أكباد الإبل والدواب، و(انعوج) إليه الدرب... ديل طالعين، وديل نازلين... وهو متحزّم، والصواني تمرق مليانة وترجع فاضية.
ونفدت المطمورة الأولى، فحفر الأعوان المطمورة الثانية، ومن مطمورة إلى مطمورة نفدت كل المطامير.
قالوا ليهو:
(العيش كمل).
قال ليهم:
(كيف؟ المطمورة الفلانية حفرتوها؟)
قالوا ليهو:
(أيوه)
(والتانية؟)
قالوا:
(حفرناها!!)
(وبعدين؟!)
ومع أزمة العيش، داهمته شكية نسوان البيت من شدة الخدمة.
قالوا ليهو:
(ضهرنا انكسر من العواسة... أتعبتنا... كرهتنا)
فأسقط في يد الرجل، واستسلم، وعاد إلى الشيخ مسترجعاً شاكياً.
وقال ليهو:
(رجعت لي كلامك... حابقى بس على ضيف الشريعة... ولكن البيوقف الناس مني شنو؟!)
قال ليهو الشيخ:
(رسِّل زول لسوق المسلمية يكورك: يا ناس... فلان ود فلان خلاص طوى برشو)
بتصرّف كما يحكيها الأخ الراحل أحمد محمد أحمد البشير.
لا يكلف الله نفساً إلا وسَّعها
ما يُستفاد من القصة أعلاه هو *موضوع (الإذن)*.
للأستاذ سعيد الطيب شايب قراءة لطيفة للآية:
﴿لا يكلف الله نفسا إلا وسَّعها﴾
ولعله سمعها من الأستاذ، إذ يقرأها بفتح الواو، أي: جعلها واسعة، تطيق ما يكلفها به، وهي قراءة فيها «سعة» غريبة.
وفي باب (السعة)
 و*«العشم»* في الله – التوكل – كتب مرة كاتب هذه السطور عن الأستاذ سعيد:
حريييييييييييييص عليكم
تشكي له واحدة من بناته الجمهوريات... تشكو من المصران العصبي...
تقول له:
«عندي قلق شديد يا أستاذ.»
يقول لها – ما معنى الكلام –:
«وشنو يعني؟ شنو لو عندك قلق؟»
تقول له:
«مرات ما أقدر أنوم.»
يقول لها:
«وشنو يعني لو ما نمتي؟؟»
يكرر دائماً:
«في زول شكروهو بالنوم؟؟!!»
تتحير، ثم تصمت...
يعزيها فيقول:
«عليك الله، عندك زول زي النبي، ما تشيلي حملك كلو وتختيهو فوقو.»
ويقرأ لها:
﴿لَقَدْ جَاءَكُمْ رَسُولٌ مِّنْ أَنفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُم بَالْمُؤْمِنِينَ رَءُوفٌ رَّحِيمٌ﴾
ثم يواصل مواسياً لها:
(إنت ما تبقي زيي كدا... قلبي ميِّت... البيت مرات يكون يرفس بالناس، ولا عندنا حق الشاي، ولا عندنا حق السكر... بعد شوية يجي الشايل الشاي، ويجي الشايل السكر... وأنا قاعد في عنقريبي دا، لا عندي شغلة في دنيا، ولا عندي شغلة في آخرة)
ولعله قال:
«لا هاماني دنيا، ولا هاماني آخرة...!!!!!!...»
::.
. :
*سلم الأمر إلينا تجدنا أولى بك منكا.